 |
| 四個月人仔，好似真係識得應人咁…… |
地點：我們家
人物：晴晴、晴姑媽
當天我不在家，有勞嫲嫲和姑媽幫忙湊晴晴。晴晴最近都開始多嘢講，好多BB話。當晴姑媽抱住晴晴時，佢竟然望住個姑媽，叫咗兩聲好大聲：「姑～姑～」氹到阿姑姑幾鬼開心！（連爸爸媽媽都未叫呀陰功……╰(‵□′)╯）之後，姑姑抱住佢喺我哋屋企行咗一個圈，姑姑同晴晴講：「你爸爸媽媽都幾懶喎！諗住屋企樓下就有超級市場就唔入定你啲貨……」點知晴晴突然縐眉頭兼且「嗯～」咗好大聲（好似抗議咁！）姑姑即刻笑住話：「唔係唔係，你爸爸媽媽最好！」晴晴即刻笑番！
事件二：
地點：我們家
人物：我們仨
這幾天悶熱得很，晴小姐熱得發脾氣狂哭！連抱住佢嘅爸爸都嬲埋！於是提早一點開睡房冷氣，抱晴小姐入去涼，終於肯收聲。一家三口窩喺張大床，晴小姐夠鐘食奶。於是我問：「晴晴你想邊個餵你食奶呀？」爸爸問：「爸爸餵好唔好？」晴小姐望都唔望個爸爸。我再問：「咁媽媽餵好唔好？」晴小姐望住我，一把可憐聲咁：「嗯～」好喇好喇…媽媽餵啦！好似真係嬲咗個爸爸咁… ╮(╯▽╰)╭
事件三：
地點：娘家
人物：晴晴、大姨媽、婆婆、媽媽（即係我 XD）
話說，剛過去的週末回娘家跟月爸和月媽打麻雀。爸爸抱住八掛晴晴在後頭觀戰。剛巧我拿著一手大牌叫糊中，輪到婆婆打牌，晴晴突然吚吚吔吔在叫，大姨媽話：「晴晴咁緊張，媽咪手牌係咪好大呀？」晴晴繼續「嗯～」跟住婆婆就打咗隻牌出沖畀我！大家就話，原來晴晴吚吚吔吔就係叫婆婆唔好打好大鑊呀！XD（對號入座得好緊要 XD）
之後有一手，大姨媽叫糊，但兩隻牌唔知打邊隻好。於是大姨媽問晴晴：「打呢隻好唔好？」晴晴無反應。再問：「咁打呢隻好唔好？」晴晴就吚吚吔吔！（大家已經喺度勁笑…）結果大姨媽又跟晴晴打嗰隻，咁就出沖畀婆婆…三番咁多！（我們家打台灣牌，三番其實好細XD）大姨媽話：「梗係頭先搞到婆婆出咗舖大牌，而家要我畀婆婆食番舖…不過三番咁細OK啦！」╮(﹀_﹀")╭
到底係次次都咁啱？大家對號入座？定係晴晴真係同我哋傾緊偈？
