知道我工作性質的朋友，都知道我好早放工，而且仲要非常準時！是的，小妹的下班時間是下午四時正！
不知有多少人很羨慕我可以早放工兼準時放工：你就好啦！咁咪大把時間去shopping唔洗同人爭囉！哇，放工去個銀行都仲得呀！book時間做facial都易book好多啦！咁你第時結左婚咪可以買埋餸返屋企等老公返黎食囉！等等等等……
是的，我也覺得早下班真的很不錯！特別是我以前家住北角的時候！下班了回到家裡才不到四時半！即使約朋友六時多七時吃飯，還有時間回家洗個澡甚至小睡片刻！可是，別忘了小妹現在搬了去偏遠地區東涌居住！整個故事就變得不一樣，甚而成了一個小惡夢了！
住得遠，總不成下班後還回家再出來！約好晚上七點半，回家都已經五點半，坐不到半小時又要再出去了！（因為要預番起碼一個鐘出去！）再加上，車錢實在是貴貴貴！好吧！那去行街吧！不過行街又會好容易不小心洗錢，然後買一堆連屋企衣櫃鞋櫃都快放不下的衫裙褲鞋！最麻煩的還是要揪著大包小包繼續下場約會！所以有時，我也會拿一本書，找個coffee shop坐下來看書，又或是帶我阿囡（我部小notebook）出來做下正經事。不過阿囡即使是已經算是比較輕，但捧著它一直在街上走還是會很累的！
又或者，有時有些突如其來的約會或變數，沒有好好準備，還是會失預算。就好像星期四下午，突然間三點出完銅鑼灣開會阿姐叫我唔洗返公司！我都唔知開心定唔開心好！因為約左晴晴五點幾陪佢去揀姊妹裙！結果，我在銅鑼灣行左兩個幾鐘頭行到成個銅鑼灣就快畀我行爛！不過我覺得自己好叻！因為我竟然一蚊都無洗過！哇哈哈！Y^O^
話說，昨天下午就是因為「變數」呆等，我發了一場小脾氣！在此，謹再次向親愛的小主說聲對不起！事情是這樣的：星期五約了小主和另一個姊妹Ava去揀裙，小主之前就跟我說，她應該五點收工，五點半可以到尖沙咀匯合我！我就想我四點收工到尖沙咀都差不多五點，都係等佢一陣之嘛，於是就諗住行下加連威老道等佢都可以啦，就無帶書無帶notebook出來！點知，五點幾打畀小主無人聽，五點半先收到佢電話，話佢開車過緊隊道！當時，我其實已經行到好攰，行到唔想再行！聽到佢咁講仲要話泊架車去海港城！（我覺得由海港城行過來加威係幾遠的一回事！）於是就忽然發了一下小脾氣！連小主都問我：你今日做咩事呀……當然，佢亦有連聲sorry！事後見到佢，我都有同佢say sorry，佢亦同我講對唔住！正因為我已經行到唔想再行，我搵左一個可以畀我呆企地等而無咁礙眼的地方企住黎等：我企向一個巴士站！佢見到我都嚇一跳。
我呆等期間，都不禁問自己，我做乜事咁忟發脾氣？綜合結果有三：1. 佢本來話五點半，我於是就真係預佢五點半，而無帶到任可「等人打發時間道具」結果等耐左，失左預算。2. 之前一日（即星期四）我已經因為等人用兩個幾鐘行爛左個銅鑼灣。3. 天氣好熱，條街仲熱，我已經行到好攰。以上一切，或者有人認為都是我將我發脾氣合理化的藉口，只不過我想話成日係咁真係唔多好受囉！
小主，對不起，我把我們昨天的事這樣寫了出來！事實上，我真係只係想講，其實有時太早放工，都未必係一件好事！如果，住得遠又放工放得早仲衰！情況嚴重的話會加速令你與朋友疏離！因為你太早放工而朋友往往約你約到好晏，你可能會因為唔想等而推掉約會，當你推得三五七次，朋友會開始唔搵你，繼而漸漸疏遠……
這個問題的解決方法：一係搵過份無咁早放工的工作，一係搵間近一點的屋放左工都可以返屋企hea陣先！
然而，我還是慶幸我可以早放工！特別是當我的朋友都告訴我七點幾八點收工算早，或者返到屋企十點先食飯跟住無耐又要訓搞到好肥，而我可以五點半返到屋企七點食飯十一點先訓覺的時候，我不敢再說甚麼了。
